ناس كتير بتفتكر " السلعوة " مجرد كائن خرافي أو حكاية قديمة بنخوّف بيه الأطفال..
تعالوا أحكيلكم قصتها الحقيقية اللي خلت الناس تخاف تمشي في الشوارع بعد المغرب..
بطلة قصتنا نبوية، اتولدت في قرية صغيرة في قلب الصعيد، وسط أسرة على قد حالها خالص، وكانت البنت الوحيدة على 7 صبيان.
ورغم أنه كان عندها أخوات صبيان، والمفروض ده كان يشفع ليها، بس أبوها كان يطيق العمى ولا يطيقها!
طول الوقت ضـرب وإهانة وشـتيمة، وأمها يا حبة عيني كانت مغلوبة على أمرها، لا قادرة تنطق ولا تفتح بقها بكلمة، وإلا كان رماها في الشارع..
وفي يوم كانت نبوية بتكنس حوش البيت في وقت العصرية، وقتها أبوها دخل البيت بسرعة كأنه فيه حاجة بتجري وراه..
وبعدها بدقايق أم نبوية نادت عليها، وقالتلها فيه عريس متقدم ليها وهما موافقين خلاص.. ولما نبوية سمعت الخبر اتصدمت لأنه وقتها كان عندها 14 سنة بس يعني طفلة!
ازاي هتقدر تتحمل مسؤولية بيت وزوج والعيال وهي في السن الصغير ده؟؟ بس أبوها مادام وافق مش هتقدر تقول لا أو ترفض.
وسبب موافقة أبوها أنهم في الزمن ده كانوا شايفين البنت عار لازم يتخلصوا منه بسرعة..
وبالفعل اتزفت نبوية على محمود إللي كان عنده 30 سنة، وبقيت مراته رسمي وكان بيعاملها زي أبوها بالضبط ضـرب وإهانة كل يوم ده غير حماتها اللي بتوقعها كل يوم في مشكلة شكل عشان جوزها يضـربها.
ونبوية كل ده ساكتة ومتحملة عشان عارفة أبوها مش هينصرها ولا هيوافق تطلق..
وفي يوم ونبوية بتطبخ في المطبخ، دخلت حماتها وسمت بدنها بكلام يوجع، عايرتها إنها لسه مخلفتش رغم إنها متجوزة من سنة، وبعدها دخلت وراها سلفتها وقعدت تتمنظر بعيالها وتعايرها إنها لسه محرومة من الخلفه، ونبوية مكنش ليها عين تنطق بحرف.
وفضلت سنين طويلة على الحال ده نبوية محرومة من نعمة الخلفة، وحماتها كل شوية تفكرها أنها أرض بور وتزن على جوزها أنه يتجوز عليها وبالفعل اتجوز عليها.
والضغط زاد أكتر على نبوية من أهل جوزها بعد ما ضرتها خلفت واد.. وفي يوم قررت تعمل حاجة عشان تخرس أهل جوزها للأبد..
نبوية راحت لمشعوذة في بلد قريبة عشان تلاقي حل للخلفة، والمشعوذة طلبت منها طلب صعب تتعلم السحر وتشتغل زيها.
ونبوية وافقت من غير تفكير، عشان كان كل اللي هاممها وقتها إنها تحمل وتكسر عين أهل جوزها.
وبعد أسابيع قليلة نبوية حبلت وخلفت الواد، وقتها حماتها والعيلة كلها بقيت تحترمها.. كأنها الوحيدة اللي خلفت واد.
وحماتها مكنتش شايفة غيرها من السحر اللي عملته ليها نبوية بعد ما اتعلمته من المشعوذة.. أما ضرتها وسلفتها حماتها بتعاملهم زي ما كنت بتعاملها زمان وأكتر كمان لدرجة أنها كانت السبب في طلاق ضرتها.
بس الموضوع موقفش لغاية كدا.. لا دي كانت بتنتقم من أي حد مكنش بيعاملها كويس زمان.
عملت عمل لحماتها واتشلت ومبقتش تقدر تتحرك من مكانها لغاية ما في يوم صحيوا على صوت صراخ قوي من نبوية واتضح أنه حماتها مـاتت.
ومحدش شك خالص أنه نبوية خـنقتها بإيدها خصوصاً أنه حماتها كانت بتعاملها كويس في آخر أيامها.
أما جوزها خلته يعمل حادث وبقا قعيد مبيعرفش يدخل الحمام لوحده، ومرت الأيام ونبوية بقيت أسوأ من الأول، أي حد يأذيها بكلمة أو حرف ميسلمش من سحرها.
وفي يوم نبوية كانت رايحة كعادتها للمشعوذة، بس المرة دي شافها حد من أهل البلد وهي داخلة عندها.
والناس وقتها بدأت تربط بين اللي حصل لحماتها وجوزها وبين مشاوير نبوية للمشعوذة.. واسنتتجوا أنه نبوية مشعوذة!
البلد كلها قامت مقعدتش.. رجالة البلد اتجمعوا وشالوا شوم ونار وراحوا على بيتها بأعداد كبيرة.
هجموا على البيت، كسروا الباب وسـحلوها في وسط الشارع.. وفضلوا يعـذبوها بطرق بشعة، ضـرب وسـحل وإهانات، وحـرقوا وشها ورموها من الدور التاني، كل ده وهي لسه حية فيها الروح!
وفي الآخر رجعوها على بيتها تاني.. وحـرقوها مع البيت، وآخر حاجة شافتها نبوية ابنها وهو ماسك إيد ضرتها وكان شايف أمه بتتحـرق قدامه وهو عنده 3 سنين بس.
نبوية وقتها بكيت على ابنها اللي هيحرموها منها بعد ما جابته بعد معاناة ومفرقش معاها أنها هتموت فاكرة ومحـروقة.
وبعد أيام من دفن نبوية في مقابر الصدقة، أهل البلد بقيوا يلاحظوا حاجات غريبة أوي.. أصوات حيوانات مرعبة بتطلع بعد المغرب.
ده غير الحيوان اللي ظهر فجأة وكان فيه شبه من الكلب والضبع، وكان كل يوم شخص بيتعض من الحيوان الغريب ده.
والناس سموه سلعوة عشان الشبه الكبير بينه وبين الكلب والضبع بس ده رفيع عنهم.
ولما زادت حالات العض في البلد الناس قررت متطلعش من بيتها بعد المغرب ومتمشيش في الضلمة تاني.. بس وقتها السلعوة بقيت تخبط على بيوت الناس كأنها بني آدم بالضبط.
وأول ما الشخص ده يفتح له الباب السلعوة بتهجم عليه وتعضه، ولما أهل البلد زهقوا قرروا يجيبوا شيخ عشان الموضوع مبقاش طبيعي وشاكين أنه من الجن.
بس الشيخ قالهم حاجة صدمتهم.. الكائن ده أو السلعوة اللي بتعض الناس دي مجرد ضبع بس متلبسه روح واحدة أهل البلد أذوها جامد وهي بتنتقم منهم وبتدور على حاجة تخصها، ولازم يرجعوها عشان تسيبهم في حالهم.
ساعتها أهل البلد عرفوا أنها نبوية خصوصاً اللي عضتهم، هما نفس الرجالة اللي سـحلوها وعـذبوها زمان.
بس مكانوش قادرين يخلصوا من أذاها عشان ابنها سافر بعد ما حـرقوها بأيام مع ضرتها ومحدش يعرف راحت فين..
ومن يومها والسلعوة بتلف في قرى الصعيد بيت بيت، بتدور على ابنها اللي ضاع منها، وبتاخد حقها من كل اللي ظلموها..
والسؤال المهم بقا، تفتكروا نبوية ظالمة ولا مظلومة؟ وهل الوجع ممكن يحول الإنسان لشيء مرعب فعلاً؟..
لو خلصت قراءة اكتب تم، ومتنساش تدوس متابعة عشان لسه حكاوي الصعيد مخلصتش..
ومتنسوش تدخلوا قناة الواتس عشان بنزل امتحان صغنن بعد كل إسكريبت، اللينك في أول كومنت 🖤
رواية السلعوه ( اسكريبت تخيلي ) بقلم اميرة عادل
رواية السلعوه بقلم اميرة عادل
بقلم/ أميرة عادل
ممنوع سرقة النص أو نسخه مسموح فقط بمشاركة المنشور 🖤
#السلعوة
#حكاوي_الصعيد
#أميرة_عادل
#إسكريبت_تخيلي
