طفلة تفجر مفاجأة وتنقذ بريء من الإعدام 1998 كاملة عبر روايات الخلاصة بقلم أحمد حسن
رواية طفلة تفجر مفاجأة وتنقذ بريء من الإعدام 1998 الفصل الثالث 3
وصل الأمانة اللي بأسم ذكية عبد ربه كان لغز كبير بالنسبة للمحامي وخصوصا إنه متدفعش وده معناه إنه لازم يدور على ذكية ويشوفها فين ويعرف قصة الوصل وليه مدفعتش
خد عندك كمان موضوع رئيس التحرير رغم انه بعد ما طلق جميلة اشتغلوا مع بعض طول الفترة دي في الجريدة ولكن يظل ايضا محل شك
في البداية والأسهل دايما إنك تروح للشخص اللي تعرفه وبعد كده تدور على اللي متعرفوش
بالفعل راح المحامي لرئيس التحرير وحكاله على كل حاجة ورغم إنه أنكر موضوع جوازه من جميلة بس بمجرد ما شاف صورة قسيمة الطلاق اتكلم وقال كل حاجة ..
رئيس التحرير .. انا هحكيلك على حاجة يااستاذ كامل
بالفعل اتجوزت انا والمرحومة جميلة بعد وفاة جوزها بكام سنة بس متفقناش مع بعض ومن شيم الكبار ان الفراق بكل هدوء
كامل .. ممكن اعرف متفقتوش في ايه ؟!
رئيس التحرير .. بصراحة جميلة حملت وانت عارف اني متجوز ومكانش ينفع في الوقت ده نعلن جوازنا قدام الناس لأن لو ده حصل كان مستقبلي ومستقبلها هيدمرو
كامل .. إيه علاقة الإنجاب وإعلان الزواج بالمستقبل ؟!!
رئيس التحرير .. ماهو انا كنت متجوز بنت صاحب الجريدة اللي انا وجميلة كنا بنشتغل فيها
كامل .. ايوة عشان كده اتفقتوا انكم تنزلوا الجنين وتنفصلوا
رئيس التحرير .. بالعكس هنا كان الخلاف بيني وبينها بصراحة هي كانت رافضة تنزله حتى لو على حساب مستقبلها خصوصا اننا كنا فاهمين انها مبتخلفش بس ربنا اراد انها تخلف معايا ، ولما لقيتني مصمم على نزول الجنين خيرتني ما بين تكمل في حملها ونفضل مع بعض او تنزل الجنين ونتطلق ولما لقتني برضو مصمم على تنزيل الجنين قالتلي أنا كنت ممكن اخلفه غصب عنك حتى لو كنا هنتطلق بسببها
بس مش جميلة علام اللي تخلف عيل من واحد جبان خايف يواجه مصيره ولما حاولت إني اقنعها نكمل زي ما احنا من غير خلفة ! ردت عليا إن شرطها الاساسي عشان تنزله إننا نتطلق وبالفعل نزلته واتطلقنا وكملنا مع بعض في الجريدة ومفيش اي مشاكل حصلت ما بينا بعدها بالعكس انا ندمت فيما بعد وعشان كده كنت بحاول ارضيها بكل الطرق سواء في الجريدة او اني من وقت للتاني اجيب زمايلها ونيجي نزورها مش عشان صعبانة عليا بس لا عشان فعلا جميلة انا حبتها حب حقيقي ومعرفتش بقيمتها غير لما سبتها
كامل .. من الأول كنت مستبعدك ولما سمعتك عرفت إنك فعلا استحالة تعمل حاجة زي دي عالعموم اسف ان كنت دايقتك
رئيس التحرير .. بص يابني انا عايزك تفهم حاجة واحدة
إن عرفة كده كده هيطلع برائة لو فعلا هو بريئ ماهو ربنا مبياخدش حد بذنب حد
ويمكن الحكمة من إن عرفة يكون المتهم الأساسي
هي إن جميلة مكانش ليها حد يجيب حقها وربنا حط إنسان محبوب من كل الناس لاجل ما كلهم يسابقوا الزمن عشان يبرئوه وييجي حق جميلة اللي ملهاش حد غير ربنا في صورة عرفة ،والله وأعلم
ــــــــــــــــــــــــــــــــ
المهمة التانية كانت في ذكية عبد ربه وبعد تعب وكثرة السؤال عليها بطرق كثيرة لاداعي لذكرها لعدم الإطالة عليكم
وجد المحامي الحاجة ذكية عبدربه
وأكتشف إنها ست بتشتغل مربية في دار ايتام وفي مرة كان في طفل عندها محتاج عملية ضروري والوقت مش هيسعفها إنها تعملها على حساب الدولة أو تلمله تبرعات فبحكم معرفة صديقة لها للأستاذة جميلة وإنها بتحب تعمل خير جتلها ذكية طلبت منها الفلوس عشان العملية ولما معالم وش ذكية كانت مستغربة او مش مصدقة او يمكن خايفة تدي فلوس لحد متعرفوش وفي نفس الوقت مش هينفع تروح تشوف بعينها لضيق الوقت
اصررت ذكية على إنها تمضي على وصل امانة رغم إن جميلة إتطمنت ليها بس برضو حلفت لتمضي على وصل أمانة لحد ما تيجي الأستاذة جميلة وتشوف الطفل بعد العملية وتشوف التقارير بعينها
وبالفعل راحت بعد فترة الاستاذة جميلة وأتأكدت من الموضوع وكافئة ذكية بمكافئة كويسة
ـــــــــــــــــــــــــــــــــــــــــــــــــــــــــــــــــــــــ
(( معلومة خارج الرواية ))
(( بالمناسبة الطفل اللي عمل العملية ده إحفظه كويس جدا جدا لأنه هيكبر ومستقبلا هتبقا ليه رواية معايا ولا في الاحلام ومش هقولك هو أصبح مين من المشاهير 🧐))
ـــــــــــــــــــــــــــــــــــــــــــــــــــــــــ
وبكده أصبح رئيس التحرير وذكية خارج حسابات المحامي
حتى عباس المسج،ون خرج معاهم برضو
ويرجع الشك على معتز وممدوح بس للاسف لحد دلوقتي محدش أعترف والميعاد عمال بيقرب
والبحث شغال في كل حتة وكل مكان
حتى الظابط اتعاطف مع المحامي والناس وبدأ هو كمان يسعى معاهم عشان يلاقى القا،تل الحقيقي ولكن دون جدوى
ــــــــــــــــــــــ #كشف_حقائق_واسراربقلم_احمدحسن
تعال بقا ارجع معايا حبتين لورا لحد نهاية الفصل اللي فات
شفنا في أخر الفصل مشهد للأستاذة وفاء والطفلة ميادة
وقد إيه الطفلة المتعلقة بعم عرفة ومتأثرة نفسيا بغيابه
وكل شوية بتسأل عليه رغم إن في كل مرة بتسمع نفس الإجابة وإنه عمو عرفة مش راجع تاني الخ..
لحد ما اليوم ده أصررت على سماع سبب مقنع
وأمها عشان خايفة عليها مقدرتش تقولها إنه قت،ل جارته
بس إختارت أخف الضررين وقالتلها إنه سر،ق فلوسها ودهبها
وشفنا وقتها إنها جريت على اوضتها وأمها فكرتها إنها متأثرة باللي سمعته او مش مصدقة
بس ميادة كان فيه في دماغها حاجة تانية خالص
وهي إنها في نفس الليل كانت قلقانة جنب امها بعد النور ما جه مرة واحدة وهي مش متعودة إن النور ييجي بالليل وزي ما إحنا عارفين إن الست جميلة كانت بتقفل النور من الساعة 11 مساء للساعة 6 الصبح
طيب كده ميادة قلقت ومش جاييلها نوم ، فكان عندها عروسة لعبة بتحبها وأخر مرة كانت في إيدها بتلعب بيها في الصالة وفي لحظة ما هي خرجت تجيب العروسة من الصالة عشان تنيمها في حضنها سمعت صوت حاجة خبطت برة !!!
إتمشت ناحية الباب وبصت من الخرم شافت حد خارج بيتسلل من شقة الأستاذة جميلة
وهو بيقفل في الباب وخارج ولسه بيلف بوشه لتحت عالسلم خد باله من الظل اللي واقف من داخل الشراع الإزاز بتاع شقة وفاء
ومن اللبخة وقعت منه قطعت الدهب على الارض ولسه هيرجع يجيبها لقي الباب بيتفتح
نزل يجري عالسلم ولما خرجت ميادة بصت لقته اختفى بسرعة ورجعت شافت قطعة الدهب على الأرض
ومن إستعجالها وهي بتميل تاخدها بحركة لا إرادية شاطتها برجلها دخلت من تحت عقب الباب عند عم عرفة
رجعت بعدها ميادة تقول لأمها بس أمها كانت غرقانة في النوم ومش مجمعة مع ميادة خالص
وعشان الأطفال الصغيرة بتتأثر بأي فكرة حواليها سواء كانت سلبية أو إيجابية ميادة قعدت تفكر في حاجات كتير وأفتكرت إن جدها عنده مذكرة بيكتب فيها كل حاجة
ودايما بيتخانق مع ميادة حفيدته لما كانت بتجيب مذكرته وتقعد تقرأ فيها كان دايما بيقولها إن المذكرة مش بتتكتب فيها غير الحاجات المهمة اللي مينفعش نقولها لحد وبتتشاف بس وقت ما الإنسان بيروح عند ربنا وتقعد الناس تكتشف الأسرار وبتبقا فرحانة بإنه كان كاتب مفاجئات كتيرة
وعشان طبعا حياة الطفل مش بتبقا فيها حاجات كتيرة مثيرة
فمصدق ميادة لقيت حاجة تنفع تبقا سر وتبقا حدث بالنسبالها وتكتبه
كتبت الطفل ميادة الحدث اللي شافته وأعتبرته سر من أسرارها ومحدش ينفع يشوفه زي ما جدها بيعمل بالظبط
وهنا بقا لما ميادة راحت تجري على اوضتها وفتحت مذكرتها
وقعدت تقرأ الحدث اللي كتبته فهمت إن مش عرفة هو اللي سر،ق الدهب بس برضو كان في دماغها إن ده سر ومحدش ينفع يعرفه وعشان حيرتها قررت إنها تسأل جدها وتستفسر منه بالطريقة من غير ما يعرف السر
وإنتظرت لحد ما امها تروح عند جدها عشان تقعد وتكلمه
----------------- #كشف_حقائق_واسراربقلم_احمدحسن
في الناحية التانية بنشوف ام المحامي كامل قلقانة ومتوترة في البيت من غياب ابوكامل من اخر النهار لحد الساعة 12 بالليل ولما جه كامل وشافها متوترة سألها مالها وامه قالتله إن ابوه مرجعش من اخر النهار واحنا بقينا نص الليل والفترة دي بقا بيغيب كتير
على قد ما الخوف ووساوس الشيطان من كامل وخوفه على ابوه خصوصا إن اتسبب في حب،س معتز وممكن معتز يردهاله بأذية ابوه
على قد ماكانت فيه حيرة تانية لما امه قالتله إنه بقا بيغيب كتير الفترة دي !!
وبعد طول انتظار بيرجع ابوكامل على الساعة 3الفجر
ولما سأله كامل ..
كامل ..انت كنت فين يابويا ده كله ؟!!
ابو كامل .. ايه ياكامل هتحاسبني ولا ايه !
كامل .. اعوذ بالله ياابويا انا بس قلقت عليك وامي مش جاييلها نوم من بدري
ابو كامل .. ليه وانا عيل صغير ولا ايه !!
كامل .. لا يابويا مقصدش عالعموم حمدلله على سلامتك
ـــــــــــــ #كشف_حقائق_واسراربقلم_احمدحسن
بنروح للس،جن وهناك عرفة بتجيله زيارة من صحفية معروفة وتقعد معاه وتناقشه في موضوع القضية
وعم عرفة معندوش جديد يضيفه غير الكلمتين اللي بيقولهم كل مرة
عشان كده الصحفية كانت مستعدة كويس ومجهزة أسألة خارج المنهج زي مثلا بتقوله إنه ممكن يكون ليه شركاء ومش هو اللي نفذ العملية وانه ممكن يكون سهل الموضوع للجاني وإنها ممكن تساعده لو قال مين شريكه
الخلاصة إنها كانت بتستفزه عشان تطلع بتصريح صحفي جامد غير اللي سبقوها
بس بالعكس عرفة كان ثابت وبيحاورها بكل ثبات مصحوب بإبتسامة فيما معناها إنه فاهم انها جاية تلبسه القضية حتى لو معملهاش
وفي وسط كثرة الأسئلة سألته سؤال خلى عرفة يسرح شوية
قالتله .. ممكن تكون انت معملتش كده بس أكيد اللي عمل كده ممكن يكون قعد معاك بحكم إنك كنت قريب منها وعرف منك بذكائه طبيعة الشقة من جوة وإن الست جميلة بتبقا مضلمة النور بعد الساعة 11 مساء وعرف منك كل التفاصيل وبعد كده نفذ عملته، هل في حد عمل معاك كده؟
السؤال ده خلى عرفة يسرح شوية ويفتكر إنه قبلها بيومين كان قاعد مع الحاج سلامة كبير المنطقة اللي طبعا إحنا فاكرين إنه اتحبس مؤقتا عشان يبرئ المحامي ويكمل القضية ، وفي اللحظة دي افتكر كمان إن المحامي لما حكاله تفاصيل ازاي خد الورق وإن الحاج سلامة وقف معاه وقفة حلوة ، بس كان مستغرب مين اللي يقدر يبلغ عن ناس في وسطهم كبير المنطقة الحاج سلامة ؟!
الصحفية .. انت معايا ياعم عرفة ؟! انا عمال اتكلم وملاحظة إنك سرحت ومش معايا خالص ! ها قولي افتكرت إيه ؟
عرفة .. مفيش يااستاذة انا معاكي ، وصمم عرفة إن المحامية متطلعش من وراه بأي تصريح يعمل ضجة
بس بعدها عرفة كان هيتجنن عشان يوصل للمحامي ويعرفه اللي بيدور في دماغه وفي نفس الوقت الموضوع محرج خصوصا لو الحاج سلامة طلع ملوش يد في الموضوع
وهو اصلا واقف وقفة حلوة مع عرفة وممكن يخسره مدي الحياة لو حس إن عرفة شك فيه وإن ورا اللي حصل
ـــــــــــــــــــ #كشف_حقائق_واسراربقلم_احمدحسن
يومين والمحامي راح لعرفة وهناك عرفة حكاله على كل حاجة ومن هنا دخل الشك في قلب المحامي وبدأ يربط الخيوط ببعضها وأول حاجة عملها هي إنه ياخد زيارة ويروح بيت الحاج سلامة كأنه بيزورهم تقديرا للي عمله معاه في الموقف المذكور مسبقا
وبالفعل راح هناك وقعد معاهم
وحاول يجرجرهم في الكلام وبالطريقة عرف معلومة زودت الشك أكتر
وهي إن الحاج سلامة الليلة دي بالذات رجع البيت وش الصبح !!!!
وخد معلومة تاني أكبر وهي إن أخر واحد كان عند الحاج سلامة ومشي الساعة 9 بالليل كان ابو المحامي نفسه
تعالى معايا بقا أدخلك في الرعب اللي عايشه كامل جواه
كامل وهو بيستفسر عن الحاج سلامة وكان فين ليلة الواقعة
دماغه جابت إن ابوه برضو كان رجع الصبح نفس موضوع الحاج سلامة وبدأ يربط ما بين غياب ابوه الفترة دي على غير العادة وما بين ليلة الواقعة خصوصا إن ليلة الواقعة كانت أول ليلة في رحلة غياب ابوه عن البيت
كده كامل دخل في حسبة جديدة عقله ولسانه رافضين يدخلوا فيها وهي إن ممكن ابوه والحاج سلامة ليهم علاقة بالواقعة ؟!!!
او ممكن يكون واحد فيهم والظروف المتشابهة اللي جمعتهم كانت بمحض الصدفة مش أكتر !
يبقا الحل إيه..
الحل كان بالنسبة لكامل هو إنه يراقب ابوه ويراقبه بنفسه عشان الموضوع حساس ويشوف ابوه بيغيب يروح فين ؟!
ـــــــــــــــــــــــــ #كشف_حقائق_واسراربقلم_احمدحسن
تعال نريح أعصابنا عند الأستاذة وفاء شوية
الأستاذة وفاء خدت بنتها وراحت زيارة لبيت اهلها كالمعتاد
وطبعا إحنا عارفين مين اللي منتظر الزيارة دي على احر من الجمر مييين ؟
ايوة الطفلة ميادة عشان تسأل جدها عن إنه ينفع لو حد كاتب حاجة بخصوص ناس تانية ينفع يصرح بيها قدام حد ولا كده تبقا المذكرة باظت؟ ( عقل اطفال ولازم تعذرهم )
جدها كلمها عن ان المذكرة ممكن نستعيد منها أحداث ونشاركها في الواقع
يعني إحنا ممكن مثلا نحط فيها تواريخ اعياد الميلاد بتاعت ناس تهمنا وممكن نرجعلها من وقت للتاني عشان مننساش
وممكن لو حد عطانا امانة معرضة للنسيان زي فلوس او وعد برضو بنكتبها عشان مننساش ونحفظ بيها حقوق الناس
ميادة .. يعني ياجدي انا ممكن لو حاطة فيها حاجة مهمة ينفع اقولها لحد تاني ؟!
جدها .. مادامت الحاجة دي متعلقة بحد تاني ليه لأ بالعكس ده كده انتي تبقي استغليتي مذكرة وخلتيها نفعتك وحسيتي بنفعها
ميادة .. متشكرة ياجدو انا بحبك اوي
وهنا ميادة بقت مستنية اللحظة اللي تروح فيها بيتها عشان تبهر امها إنها محضرة مفاجئة متعرفهاش وتحكيلها إنها شافت تفاصيل الحرامي اللي سر،ق الدهب وإن عمو عرفة مسرقش الدهب زي ما أمها قالتلها
بس للاسف امها باتت يومين عند أهلها
بس على الرغم من إن الحقيقة بدأت تقرب من ناحية ميادة وكلها مسألة وقت
الا إن المحامي كمان بيقرب من ناحيته وكل شوية الدايرة بتضيق أكتر
المحامي كام مجهز نفسه كويس لمراقبة ابوه
اول ليلة راقب ابوه بس من حظه ابوه قعد على القهوة لحد الساعة 11 وروح
الليلة التانية رشقت وخروج ابو كامل كان الساعة 10
وكامل كان مراقبه
وبعد 3 ساعات من المراقبة المحامي بيوصل ورا ابوه للمكان اللي رايحه وبتحصل مفاجئة كبيرة ...
راجعلك تاني اصبر 🤌
ـــــــــــــــــــــــــ
الصبح ميادة كانت رجعت البيت
وأول ما رجعت جريت على اوضتها ومسكت مذكرتها اللي فيها وصف الشخص اللي كلنا بندور عليه ومخبياها ورا ضهرها
امها .. مالك ياقلبي مخبية ايه ؟!
ميادة .. مخبية مفاجئة متعرفيش عنها حاجة
الام .. مفاجئة ايه ياترى اللي ماما متعرفهاااش
ميادة .. امسكي المذكرة دي واقلبي صفحتين واقري
الام .. مسكت المذكرة وبدأت تقرا وعنيها توسع ...
يتبع .. #كشف_حقائق_واسراربقلم_احمدحسن
رواية طفلة تفجر مفاجأه وتنقذ بريء من الإعدام الفصل الرابع 4 والأخير
جاري كتابة الفصل، اضغط هنا
رواية طفلة تفجر مفاجأة وتنقذ بريء من الإعدام 1998 كاملة من هنا
