رواية العراف الفصل الثاني 2 بقلم أحمد عبد الرحيم
رواية العراف الفصل الثاني 2
#قصص_جاسوسية #العراف
(القصة كاملة)
--------------------------------------
* بعد نكسة 1967 والهزيمة المخزية للعرب واحتلال الأراضي.
الفترة دي كانت بالفعل من أسوأ الفترات اللي عاشها المصريين في تاريخنا الحديث...
مشاعر حزن وإحباط منقطعة النظير مع سخرية مريرة من الهزيمة القاسية ومن الجيش المصري من المصريين أنفسهم وغضب مكتوم بشكل رهيب وينذر بانفجار بركان وخاصة مع تسويف وتأجيل القيادة السياسية على رأسها الرئيس السادات لقرار الحرب.
- في نفس الوقت كان جنرالات إسرائيل عايشين في خيلاء وغرور رهيب مع يقين تام باستحالة دخول العرب وخاصة المصريين للحرب وعلى الأخص بعد إقامة خط بارليف اللي كان عندهم يقين باستحالة اقتحامه بأي شكل .
في الوقت دا كانت إسرائيل فاتحة أبوابها لهجرة اليهود إليها من كل أنحاء العالم.
وكان من الناس اللي هاجرت شاب إسمه..
"دافي كرينهال"
دافي شاب جي من الإتحاد السوفيتي، واضح من شكله ولبسه وجسمه إنه فقير جداً.
تم فحص أوراقه..
دافي مش معاه أي شهادات تؤهله لأي عمل مرموق في إسرائيل وكما حدث مع الآلاف غيره من المهاجرين تم توزيعه على "الكيبوتز" للعمل في الزراعة.
وهناك بدأ دافي يتعرف بالناس في الكيبوتز ويحكي قصته للكل...
هو يهودي سوفيتي، الحزب الشيوعي اعتقل والده وهو عنده 11 سنة ولم يره بعدها، كم سنة ووالدته توفت.. وحالته تدهورت تماماً، قابله رحل يوغوسلافي أشفق عليه واصطحبه معاه إلى تركيا ومن هناك ركب سفينة إلى إسرائيل وجه وهو متوقع إنه دخل الجنة وهيحقق كل أحلامه فيها.
- ثلاث شهور قضاها في الكيبوتز يحكي نفس القصة ، الناس تعاطفت معاه وخاصة مع شكله وعدم امتلاكه أي مواهب في أي مجال...
خلال الأشهر التلاتة كان عرف كل حاجة وكل شخص تقريباً في الكيبوتز ، كان ليه أصدقاء بيقعد معاهم في المساء يتسامروا منهم فاتنة إسمها "راشيل" وأمها العجوز مدام "استر".
في ليلة فجأة وهو قاعد معاهم، عينيه زاغت وشكله اتغير تماماً وصوته أتغير لدرجة إن الكل فكروا حاجة حصلت له، فجأة تكلم دافي و قال بصوت غريب:
"يارون بلونكسي غلط لما رفض الإعتراف باللي عمله، لكنه الآن ندم وقرر إنه يدفع الثمن وهيدفع الثمن قريب "
- الكل اندهش من الكلام طبعاً ،محدش يعرف مين
يارون بلونكسي ولا غلط في إيه إلا هي ..
او قل إلا هنَّ...
راشيل وأمها استر اللي تملكهم الذهول لدرجة بصوا لدافي كأنه مش بشري.
المشكلة إن دافي قال الجملة دي وشوية كأنه استيقظ من نوم عميق وبص حواليه، وانكر إنه قال أو فاكر أي حاجة أصلاً..
السؤال الآن:
مين يارون بولانسكي دا ؟
والقصة باختصار إن استر وبنتها راشيل يهود عراقيين كانوا عايشين في بغداد، راشيل حبت شاب إسمه يارون، ودخلت معاه في علاقة غير شرعية نتج عنها حمل سفاح، يارون رفض تماماً يعترف بالعلاقة دي وهرب من بغداد ومن العراق كله.
وبقت فضيحة لأسرة راشيل عجلت من هجرتهم لإسرائيل .
السؤال المهم هو:
دافي عرف أصلًا القصة دي إزاي وهم عمرهم ما حكوها لحد؟
ولا حد يعرف للآن هو عرف إزاي.
المهم عدى كم يوم ووصل لراشيل شيك باسمها من أوربا مقبول الدفع على بنك في اسرائيل بمبلغ كبير من الدولارات وعلى ضهر الشيك جملة:
تقبلي اعتذاري.. بارون بولانسكي.
- طبعاً استر وراشيل طاروا من الفرحة بالمال وحكوا لكل الناس على نبؤة دافي وبدأ الكل يبصله بتبجيل رغم إنه أنكر إنه فاكر أي حاجة من الكلام دا.
عدى وقت وفي ليلة في سهرة في المزرعه رجعت نفس الحالة لدافي وفي الغيبوبة دي قال :
خسارة إن محراث غالي زي دا ينكسر.
المرة دي الكل أخد الموضوع على محل الجد وتاني يوم الصبح فتشوا عن كل المحاريث اللي في الكيبتوز لكن كلها سلمية ، بعدها بيوم لقوا المحراث الرئيسي اتكسر .
- الكل ذهل من نبؤات دافي وبدأ الخبر ينتشر في المزرعة والمزارع اللي حولها واتعرف اسم دافي على أنه عراف، بدأ الناس يحضروا إليه ويطلبوا منه إنه يتنبأ ليهم بالمستقبل، طبعاً كان مفهم الكل إن المسألة مش بإيده لكنها حالة بيتحصله.
كل فترة كان يقول نبؤة عن حادث أو شخص وتحصل.
وذاع صيته لحد في يوم ما لقى قدامه في المزرعة رجل صارم الملامح، من شكله وكلامه ولبسه والعربية الفخمة اللي حضر بيها يبدو إنه رجل أمن في مكان مهم في اسرائيل وكان مهمته إنه يصطحبه إلى تل أبيب.
وهناك بدأت المرحلة الثانية من مهمة دافي.
▪︎▪︎▪︎▪︎▪︎▪︎
مهما طال الوقت لابد من قرار الحرب، كلام مفيهوش نقاش لكن كل ما وقت يعدي العدو الإسرائيلي يصعبها على العرب أكتر وأكتر.
وخاصة بعد إنشاء خط بارليف..
لابد من وجود جاسوس في قلب إسرائيل نفسها، لا دا كمان يكون في قلب جيش الدفاع.
فيه معلومات لو مصر والعرب دخلوا الحرب بدونها يبقى انتحار،لكن برضو المسألة تبدو مستحيلة..
وعلشان هي مستحيلة كان تفكير السيد( أ) رجل المخابرات المصري هو كمان مستحيل وخيالي لدرجة لا تصدق.
لما قابل الشاب دا وبنى عليه خطته....
* أشرف فؤاد الطحان.
أبوه المهندس فؤاد الطحان، أول ما قابل أمه ( هيلجا بتروفا) السوفيتية الأوكرانية اللي كانت عايشة مع أهلها في مصر وقع في غرامها وتزوجها على طول لكن للأسف توفى في حادث سير قبل وفاته أشرف بيوم.
أشرف انقسمت حياته بعد كدا،
جده الأوكراني كان مرتبط بيه، ياخده يقضي الشتا هناك في أوكرانيا مع عائلة أمه وجده المصري ياخده يقضي الصيف في مصر.
أشرف نشأ يجيد اللغتين والعادات والتقاليد وكل حاجة في مصر والاتحاد السوفياتي.
لما كمل 11 سنة والدته توفت، وقتها جده الأوكراني رفض يرجعه مصر، أشرف كان عنده حنين وحب وشوق جارف لمصر ولأهله فيها، لكن اللي خفف عنه الجوابات اللي جاتله أكتر من مرة من بنت عمه "وفاء" اللي حبها جدا.
لما كبر وأصبح شاب، هرب من عائلة والدته وسافر الإسكندرية يبحث عن أهله هناك وكان في انتظاره مفاجأة قاسية جدا...
بيتهم انهار والعائلة تشردت ومحدش يعرف راحوا فين، ولما سأل عن وفاء الجيران أكدوا له انها حية لكن ما حدش يعرف مكانها.
أشرف اتدمر نفسيًا ، حس إنه في لحظة فقد كل حاجة في الدنيا وأصبح ضايع.
* أشرف ملامحه تميل للأوروبيين ويجيد الروسية بطلاقة ، في لحظة وبشكل ما لاحظه رجال المخابرات المصرية، ومنهم السيد (أ) اللي بنى خطته كلها على شكل ولغة وخبرات وبراعة أشرف في التظاهر.
ورسم السيناريو التي تم تنفيذه لحد ما أشرف أصبح داخل إسرائيل...
المخابرات المصرية تابعته بعناية كانت بتعرف كل الظروف بناءا على معلومات ما تخليه يقول تنبأ عن خبر او حدث.
عرفوا قصة استر و راشيل وبعتوا الجواب لراشيل وطبعًا عميل آخر هو اللي كسر المحراث.
* الآن نرجع لأشرف أو دافي وهو في طريقه لتل أبيب ، العربية وصلت بيه لمبنى فخم جدا، كان بيت أحد كبار جنرالات الجيش اسمه الجنرال "كوهين"
زوجة الجنرال سمعت عن دافي ونبؤاته فأرسلت تحضره .. أولاً علشان لو عرف أي نبؤات عنها أو عن زوجها الجنرال.
ثانياً يبقى حاجة مختلفة تتباهى بيها قدام زوجات جنرالات جيش الدفاع، حيوانها الأليف يعني اللي تفخر بيه.
* السيناريو دا أحد السيناريوهات اللي توقعها السيد( أ) رجل المخابرات المصري للي هيحصل مع أشرف في إسرائيل وعلشان كدا أشرف حس بثقة كبيرة واطمئنان.
وخاصة إنه ما كانش مكلف للآن بجمع اي معلومات ولا تجنيد ولا عمل أي تصرف يثير الشك فيه.
* زوجة الجنرال كوهين كانت بتحضر لحفل في الفيلا ,مدعو ليه زوجات كبار جنرالات الجيش وبعض الجنرالات أنفسهم.
وتم إعداد نبؤة أشرف بعناية المرة دي .
فجأة أثناء الحفل وبعد ما زوجة الجنرال كوهين قدمته لضيوفها وأثناء انهماك الكل في الشرب والرقص والثرثرة والضحك، شكل دافى اتغير تماماً ووشه اتقلب وأصبح كأنه في عالم آخر، توجه نحو واحدة من الحضور بمنظره وطريقته الغريبة وبدأ يتكلم...
"موضوع ميراث بلغاريا مش صحيح. وزوجك يواجه خطر كبير جداً الأيام الجاية"
الكل وقف مذهول وصمت تام عم القاعة...
مين السيدة دي؟
زوجة سكرتير وزير الصناعة الإسرائيلي..
بانبهار تام اتكلمت المرأة عن موضوع ميراث بلغاريا وقالت إنه صحيح فعلاً تماماً.
بعد الموقف دا بكام يوم كان قدام النائب العام الإسرائيلي مجموعة أوراق ووثائق تثبت تورط سكرتير وزير الصناعة في فضائح رشوة واستغلال نفوذ، وكانت فضيحة اتكلمت عنها إسرائيل كلها.
وصدق كلام دافي كرينهال .
ومن وقتها أصبح دافي العراف الرسمي لجنرالات إسرائيل.
* المخابرات المصرية خلال الفترة دي ولما بدأت تحس بنجاح خطة العراف ركزت كل جهودها وكل رجالها لجمع أكبر قدر من المعلومات لإمداد دافي بيها وطبعا بدون ما يحوم حوله أي شبهة أو شك فيه.
- لكن شهرة دافى وصداقته لجنرالات جيش الدفاع فتحت عيون أخرى عليه، وكان لابد من زيارة إجبارية وتحقيق واستجواب هناك ...
* في الموساد
وحتى اللحظة دي المخابرات المصرية كانت عاملة حسابها عليها.
لحد الوقت دا المخابرات المصرية ما طلبتش من أشرف اي حاجة يعملها، مفيش أي شك حوله، لغته الروسية ، أصله معلوماته عن الإتحاد السوفياتي.
بعد استجواب قاسي وتفتيش في كل ما يخص دافي كرينهال , النتيجة كانت سلبية.
دافي كرينهال مجرد شاب يهودي أوكراني يستخدم موهبته في التنبؤ في كسب مال وعلاقات مع جنرالات الجيش.
كدا أخذ دافي حرية مطلقة في التنقل والحركة في اسرائيل وجه دور المرحلة التالية...
--------
- جت لدافي دعوة من صاحب شركة سياحة كبيرة في اسرائيل اسمها" ماجي تورز"
( اللي يعرف الشركة دي هيربط الأمور ببعضها ويعرف مصدر جزء كبير من معلومات دافي عن إسرائيل )
الدعوة لقضاء أسبوع في قبرص سياحة وبالفعل وافق عليها,وفي قبرص كان منتظره هناك..
السيد ( أ) رجل المخابرات المصرية، كانت مفاجأة رائعة لأشرف اللي كل يوم يعرف مدى عبقرية الخطة اللي ماشي عليها .
وهناك استلم كتاب شفرات وحبر سري وجهاز إرسال واستقبال من السيد (أ) مع التعليمات الجديدة للمرحلة القادمة.
* وفي إسرائيل أصبح دافي يقضي أغلب الوقت في منزل الجنرال كوهين، كان الكل بيتكم قدامه دون أي شك فيه ولا اعتبار لوجوده وكأنه غير موجود حتى إن اشرف وصف نفسه في إحدى رسائله:
" لقد أصبحت مثل الرجل الخفي"
حتى إنه كان بيرسل بعض رسائله من منزل الجنرال كوهين نفسه ومن الغرفة اللي تم تخصيصها ليه.
* جت التعليمات من القاهرة لأشرف بأخطر وأهم مرحلة في المهمة كلها...
وفي لحظة وأثناء جلوس الجنرال وزوجته وأشرف معهم، تقمص حالة الغيبوبة والتنبؤ وقال تلات كلمات فقط ...
" الجنزال كوهين...خط بارليف... التاريخ"
الجنرال كوهين كان عمله قائد للحصون الشمالية في خط بارليف ، الرجل ما فهمش حاجة من الكلام ولا زوجته لكنهم فكروا إن معنى كلام حدوث حاجة كبيرة جداً على يد الجنرال كوهين ليها علاقة بخط بارليف.
ورغم ذلك لما طلب من أشرف توضيح عن النبؤة دي سأله بغموض :
هو خط بارليف من الداخل شكله ايه ؟
وانتهى الحوار باستعداد أشرف للقيام بزيارة لخط بارليف بصحبة الجنرال كوهين.
للآن مهمة أشرف في قمة النجاح وعلى وشك القيام بإنجاز غير مسبوق.
- وفي الميعاد المحدد أوائل مارس 1973، استعد أشرف ولبس الجاكت الجديد بتاعه الجميل جدا بأزراره الكبيرة اللامعة.
الجنرال فرج داني على خط بارليف من الداخل والتحصينات والمواقع الدفاعية فيه، داني كان يبدي انبهاره طبعًا بعبقرية وقوة خط بارليف وجنرلات إسرائيل وخاصة الجنرال كوهين.
وقامت ازرار الجاكيت اللامعة بالمهمة تماماً وخلال أيام كان عند المخابرات المصرية مجموعة كبيرة من الصور لخط بارليف من الداخل .
قدر الجيش من خلالها يعمل مجسمات طبيعية للتحصينات الداخلية لخط بارليف ويتدرب علي اقتحامها.
* إستمرت مهمة أشرف في إسرائيل كم شهر بعدها لحد أوائل شهر أكتوبر عام 1973 لما جتله برقية من مصر تطلب منه
مغادرة إسرائيل على الفور، وبعته له رقم تليفون اتصل بيه وتم تدبير تذكرة طائرة في رحلة لروما ضمن وفد سياحي لشركة (ماجي تورز) يوم واحد وكان في روما وفي انتظاره كان السيد( أ) اللي اصطحبه للقاهرة.
أشرف كان مندهش جداً ومش فاهم سبب إنهاء المهمة بالشكل السريع الغريب دا لكن بعد أقل من أسبوع فهم كل حاجة.
يوم 6 اكتوبر عام 1973 المجيد.
وفي مصر كان في انتظار اشرف مكافآت وطنه ليه ...
شقة في ارقى احياء القاهرة ووظيفة محترمة بمرتب كبير يشمل الأربع سنوات اللي قضاها في اسرائيل وسيارة حديثة و...
وفاء...
بنت عمه وحب عمره الضائع اللي المخابرات بحثت عنها ووجدتها،
ودي كانت أكبر وأجمل مفاجأة قدمتها مصر لأشرف.
في النهاية لا شئ يساوي حب الأوطان.
تحياتي.
#أحمدعبدالرحيم.
المصادر:
المجموعة 73 مؤرخين.
مجلة روزاليوسف.
المصري لايت.
اخبار العالم.
