رواية مهد القدر الفصل الثاني 2 بقلم ملك سعيد
رواية مهد القدر الفصل الثاني 2
قراءة ممتعة ❤
نزلته بدري ممكن الاقي تفاعل
ونزلت بارت هدية
____________________
الساعة 7 الصبح بتصحي قدر وبتجهز نفسها لبدأ يوم جديد وهو يوم تدريبها في شركة أبوها وبعد ما بتلبس لبس رسمي مناسب للشركة بتنزل وبتلاقي أبوها علي السفرة بيفطر
قدر بابتسامة: صباح النور علي سيد الناس
ياسين بضحك: صباح النور علي بنت سيد الناس يا بنتي عدلي الفاظك
قدر : ايه ده مش عاجباك ولا ايه يا استاذ ياسين ولا انا مش قد المقام
ياسين بصدمة من طريقة كلامها : بت إنتِ قومي من وشي اصلي مش ناقص مجانين علي الصبح
قدر بهزار : كده يا بابا ماشي الحساب يجمع
ياسين : يا بنتي إنتِ شاربة ايه علي الصبح؟!
قدر بعفوية : والله بق مايه
ياسين بيهز راسه بيأس من قدر : طب افطري علشان منتأخرش وعايزك تتعدلي في الشركة وبلاش كلامك الي محتاج مترجم ده
قدر : اخص علي الزمن انا كلامي محتاج مترجم ليه حد قالك اني بتكلم هندي
بيضحك ياسين علي هزار قدر و بعد ما بيفطروا بيروحوا علي الشركة وطبعا قدر رفضت تروح مع أبوها وركبت عربيتها لأنها بتعشق السواقة بالرغم من أنها ياما عملت حوادث بس فيه ناس مبتتعلمش من غلطها زيها طبعا
♥ ❥ ♥ ❥ ♥
فارس : يعني خلاص يا عز هتصفي كل الشغل وترجع لمصر
عز بجدية : ايوا انا مش هقدر استحمل اكتر من كده لازم ارجع و الاقيها
فارس : نفسي اعرف انت جايب الثقة دي منين هتلاقيها ازاي بس وانت متعرفش عنها حاجة من 21 سنه
عز : يا ابني إنت حد مصلطك عليا دايما بتحبط فيا بص انهاردة مش عايز اسمعلك صوت فهمت
فارس بهزار : فهمت يا عز باشا
عز : وانت جهز نفسك اسبوع بالظبط وهنرجع مصر مش هعيد كلامي
فارس : خلاص يا بني هجهز كل حاجة
عز : تمام يلا علي الشركة ورانا تصفيات
فارس : يلا يا بوص
♥ ❥ ♥ ❥ ♥
وصلت قدر للشركة ودخلت بكل ثقة وطبعا اول ما دخلت لفتت كل الانظار من جمالها وشياكتها
بتروح علي موظفة الاستقبال و بتسألها
بابتسامة: بعد اذنك ممكن تقوليلي الاقي فين مكتب الاستاذ سيف؟!
الموظفة باحترام: الأستاذ سيف في رابع دور اطلعي فوق وهناك هتلاقي الي يدلك علي مكتبه
قدر : تمام شكرا
بتطلع قدر علي السلم للدور الرابع لإنها بتخاف تركب الأسانسير وأول ما بتطلع بتسأل علي مكتب سيف وبيقولولها علي مكان مكتبه
بتروح علي مكتبه وبتدق الباب و بتسمع صوته وهو بيسمحلها تدخل وبتدخل
قدر وبتقول بمرحها المعتاد: صباح الخير يا استاذ سيف
سيف بمرح : استاذ مرة واحدة لا ميغركيش اني قاعد علي كرسي المكتب انا هنا سيف وبس انا لسه في عز شبابي
قدر بضحك : طبعا طبعا في عز شبابك تعرف اني كنت قلقانة منك بس خلاص الواضح اننا هنتفق جدا
سيف بمرح : اكيد اسالي عني كل الشركة والله عندي حسن سير و سلوك
قدر بضحك: ايه ده اهدي عليا شوية انا مش حمل الضحك ده كله بشويش بشويش
سيف بجدية مصطنعة: خلاص يا انسة قدر يلا نبدأ شغل وانا مبحبش اللعب في الشغل اهم حاجة الجدية فهمتي
قدر بابتسامة: لا اكيد يا استاذ سيف باين عليك الجدية وانا بإذن الله مش هخيب ظنك
سيف بابتسامة: يخربيتك انا قولت هتخافي مني بس خلاص بقي علشان برستيجي بقي في الارض هبدأ ادربك علي الشغل وطبعا بعد ما يخلص تدريب هتستلمي شغلك وهتبقي المديرة فياريت تعملي بأصلك وتكرميني وترقيني
قدر بضحك: يا ابني انت مسخرة بجد خلاص دربني بس وشوف انا هعمل ايه هبهرك
سيف بابتسامة: وانا واثق يلا بقي نبدأ التدريب وإلا ابوكي هينفخني وهو اصلا مش طايقني
وبدأ سيف يعلم قدر تفاصيل الشغل
♥ ❥ ♥ ❥ ♥
في مكتب عز
كان واقف وحاطط ايده في جيبه و بيبص من ازاز مكتبه وبيكلم نفسه : يا تري روحتي فين يا قدري مش هستحمل بعد اكتر من كده وخايف ارجع مصر بدون فايدة ومقدرش الاقيكي صدقيني هموت لو ملاقتكيش بس لا انا عندي امل اني هلاقيكي طول السنين دي وانا عندي امل إن هييجي اليوم الي الاقيكي فيه ونرجع زي زمان واكتر كمان هانت يا قدري هانت يا قدري و نصيبي
♥ ❥ ♥ ❥ ♥
وعدي عليهم الاسبوع بدون أحداث مهمة قدر خلصت تدريب وهتستلم إدارة الشركة مع أبوها و عز صفي كل شغله في نيويورك و هيرجع مصر مع فارس
♥ ❥ ♥ ❥ ♥
قدر كانت قاعدة في مكتبها طبعا بعد ما استلمت شغلها وبقت زيها زي أبوها بتدير الشركة وكلمتها
بعدما علمها سيف الشغل وتفاصيله
كانت بتكلم صحبتها نور
قدر بهزار : يا بنتي إنتِ عارفة بتكلمي مين انا قدر الصباغ مديرة شركات الصباغ يا حبيبتي ها عرفتي مكانتي في المجتمع
نور بضحك : يا بنتي من ساعة ما استلمتي الشغل
وإنتِ مصدعاني بكلامك ده
هو إنتِ اول ولا آخر واحدة بتدير شركة
قدر بغرور مصطنع : طبعا اول واحدة تدير شركة بجمالي وذكائي واناقتي وشخصيتي بصي كلي علي بعضي مفيش مني اتنين ربنا يحميني
نور بضحك : ربنا يهديكي إنتِ شكلك فاضية ولا ايه يا مديرة ما تشتغلي شوية ولا انتي مديرة بالإسم يلا خلي ابوكي ينفخك
قدر بغيظ : تصدقي اني غلطانة لإني بعبرك امشي يا بت خليني اشوف شغلي يلا باي
نور بضحك : باي يا مديرة
قفلت قدر مع نور وبدأت تشتغل وكأنها اول مره تشتغل واسبوع التدريب بتاعها طار ولا فاهمة حاجة في الشغل فبعتت لسيف يجيلها المكتب
وبعد مدة دخل سيف وهو بيضحك
سيف بضحك : ايه يا بنتي انا قولت ان الكل بيحبني بس مش بالطريقة دي إنتِ لحقتي تشتاقيلي
قدر بضحك : ظريف اوي تعالالي بقي علشان شكلي مش فاهمة حاجة في الشغل الحقني يا باشا وإلا هقفلكم الشركة دي بخساير
سيف بهزار: ضيعتي تعبي طول الاسبوع خسارة فيكي الكرسي الي إنتِ قاعدة عليه بس خلاص من كرم أخلاقي هعلمك الشغل براحة لحد ماتفهمي بس متنسيش يا مديرتي الترقية
قدر بضحك: مصلحجي حقير اخلص و الحقني
وبدأ سيف يعلم قدر من اول وجديد في جو مبيخلاش من الهزار
♥ ❥ ♥ ❥ ♥
رأيكم في البارت يا حبايبي
#مهد القدر
#بقلمي ملك سعيد
دمتم سالمين ❤
رواية مهد القدر الفصل الثالث 3
لقراءة باقي فصول الرواية اضغط هنا (رواية مهد القدر )
