رواية جمعتهم الأقدار عبر روايات الخلاصة بقلم فريدة أحمد
رواية جمعتهم الأقدار الفصل الحادي والأربعون 41
حلا وقعت علي باب السرايا فاقدة الوعي
جري عليها مراد بسرعة مال عليها وهو مخضوض وبقي يحاول يفوقها وهو بيقول...حلا مالك يابت.فوقي، بس هي مكانتش بتفوق
شالها واتجه بيها للعربية حطها وركب وطلع بسرعة علي اقرب مستشفي
...
بعد وقت كان الدكتور بيفحصها ومراد واقف قلقان عليها
وبمجرد ما انهي الدكتور فحصه، سأله بلهفة... مالها يادكتور
الدكتور قال... هي حصلها انخفاض مفاجأ في ضغط الدم وده دائما ما بيحصل نتيجة زعل
بص مراد عليها مش فاهم ايه اللي ممكن يزعلها انتبه للدكتور اللي كمل وقال... كمان هي عندها ضعف في المناعة وده بيؤثر بشكل سلبي.. متقلقش انا هكتبلها ادوية وان شاء الله تبقي كويسة. بس ياريت ما تتعرضش ل اي ضغط نفسي
....
بعد شوية مراد قاعد في العربية وهي جمبه ساكتة
اتأملها لثواني وقال بعد ما رفع ايده يمررها علي شعرها بحنية... مالك. مين اللي مزعلك بقا.. قوليلي ياحبيبتي.. عاصي ولا مين. قوليلي ومين ما يكون انا اقسم بالله افرجلك عليه
بصتله باستغراب مش مصدقة الحنية اللي نزلت عليه فجاة، لكن اتجاهلت ده وردت بجمود فهي مش ناسية اللي عملو معاها اول مرة، حتي لو مكانش يعرف انها اخته فهي مش قادرة تسامحه او تتقبلو في حياتها كأخوها، رافضة الفكرة
بصت قدامها وقالت... مفيش. انا مش زعلانة ولا حد زعلني . كل الحكاية اني داخلة علي امتحانات ومتوترة شوية
بصلها شوية مدخلش عليه اللي قالته فهو كان حاسس ان فيه حاجة مزعلاها،قال...انا عارف ان اللي حصل قبل ما اعرف انك اختي
وسكت لكن كمل وقال.....صدقيني مفيش حد هيحبك ويخاف عليكي قدي
بصتله بسخرية وسكتت
وهو اتنهد بتعب و متكلمش وطلع بالعربية بصمت وهي كمان فضلت صامتة بتبص من شباك العربية بشرود لحد ما وصلو
..
دخلو البيت الكل قربو عليهم بلهفة وهما بيطمنو عليها
الحاج همام ... مالك يابتي. من ايه اللي حصلك ده
قالت بهدوء... مفيش ياخالو. انا بس كنت مرهقة شوية
وفاء قالت... تعالي ياحببتي اطلعي ارتاحي
واخدتها اوضتها وفضلت معاها لحد ما نامت
.....
تاني يوم
عند سهي
سهي قاعدة علي الكنبة بتبص علي الخارج من الشباك بشرود وهي واضح جدا علي ملامحها الحزن وبقي شكلها دبلان ويعتبر مبتتكلمش خالص
قالت بسخرية مرات ابوها اللي كانت قاعدة.... مش لو كنتي عرفتي توقعيه في شباكك مكانش زمان ده بقي حالك. ياختي معرفتيش طول السنين دي تخليه يحبك.. طب ده حتي الراجل من دول مهما يكون مركزه
بشوية دلع من الست اللي قدامه بيقع ويريل...
بس اكيد العيب فيكي بقا. اصل مش معقولة طول السنين دي بتحاولي معاه وهو مفيش فايدة.. دا يعيني كارفك خاالص
هنا سها اتخلت عن صمتها اخيرا لما بصتلها وقالت بغضب.... بقولك ايه ياولية انتي خاليكي في حالك عشان لو متلمتيش هروح فيكي في ستين داهية وانا مش باقية علي حاجة
بلعت مرات ابوها ريقها بخوف من منظرها وسهي قامت بقرف تتسند علي العكاز بسبب رجلها المتجبسة
دخلت اوضتها واترمت علي السرير وبقت تبكي بحزن وهي دافنة راسها في المخدة وتقول بقهر شديد ووجع قلب... ليه ليه محبتنيش.لييه هي احسن مني في ايه.. سنين وانا عاشقاك وانت ولامرة حسيت بيا. لييه
وفضلت تبكي بقهر
.......
مساءا
دخلت ليالي عند حلا اوضتها قربت قعدت قدامها على السرير، كانت حلا قاعدة بهدوء
بصتلها ليالي لثواني كانت حاسه بيها، كانت شايفه الحزن في عينيها فقالت... حلا هو احنا ممكن نبقى اصحاب. نقرب من بعض يعني
بصت لها حلا وبرغم الحزن اللي في داخلها قالت بطبيعتها المرحة اللي اعتادت عليها... هنقرب من بعض اكثر من كده ايه ما انتي قاعده وشك في وش امي ليل ونهار. يا بنتي هو احنا بنشوف غير بعض
ابتسمت ليالي بس قالت.... انا ما اقصدش كده وانتي عارفه...
بعدين قالت.... انا قصدت تفضفضي لي
اتنهدت وكملت .... حلا انا حاسه ان انتي حزينه من جوه طول الوقت بتظهري انك مرحه وبتهزري بس حاسه من جواكي حزينه.. فضفضي لي يا حلا.
بصت في عيونها وقالت..... انتي بتحبي عاصي مش كده؟ على فكره مش هروح اقوله يعني
ابتسمت حلا وسكتت، بس ليالي ما سابتهاش قالت.... انا زي اختك يا بنتي ما احنا طلعنا اصلا قرايب.. بصي يا حلا
ومسكت ايديها..... انا عارفه انك بتحبي عاصي وده واضح جدا حتى لو بتحاولي تخبي ده.. عاوزه اقول لك ان كمان عاصي بيحبك بس هو مش عارف
بس حلا قالت بانكار.... يابنتي حب ايه وهبل ايه.. مفيش الكلام ده. احنا اتجوزنا لظروف معينة. كمان احنا مكناش نعرف بعض غير من شهرين
ليالي قالت... وهما الشهرين قليلين. ما في ناس بيحبو بعض من اول نظرة عادي
كملت وقالت.... وبعدين متحاوليش تنكري. واضح اوي انك حبيتيه. وهو كمان .. يا بنتي انتي لو بعدتي عنه يوم واحد مش هيقدر يستحمل عاصي ما بيستغناش عنك اصلا
: بس بيعتبرني زي اخته
قالتها حلا بمراره لتقول.... ليالي على فكره ده اللي بيوهم نفسه بيه.. عاصي فاكرك انك زي اخته بس هو في الحقيقه بيحبك هو ممكن ما يعرفش كده او عارف وبينكر قدام نفسه بس صدقيني عاصي ما يستغناش عنك
بعدين قالت بمرح.... قولي لي بقى انتي حبيتيه ازاي وامتى اللي اعرفه ان انتي ما كنتيش عايشه معاهم هنا وظهرتي في حياتهم بالصدفه والقدر جمعك بيهم زيي بالظبط
ابتسمت حلا وقالت بشرود .... عاصي من وقت ما تقابلنا وهو اماني في كل مره هو اللي بيحميني.. ساعات بحسه ابويا وساعات بحسه اخويا
بصت لها ودموعها في عيونها وقالت بتلقائية وبدون وعي ..... ودايما بحسه حبيبي مش عارفه امتى وازاي بس حبيته
وبقت تبكي
ضمتها ليالي بحزن عليها وبقت تقول... بيحبك صدقيني
وهي بتقول في نفسها باشفاق عليها... يخربيت الحب اللي بيوجع القلب ده
بعد دقايق بعدت حلا وهي بتمسح دموعها
وليالي قالت بثقة ... تعرفي انا متاكدة انه بيحبك لا واكتر ما انتي بتحبيه
قالت بضحك وهي بتحاول تفرفشها..... يا بنتي ده انتي لو كنتي شوفتيه امبارح لما دخل لقانا متجمعين على السفره وانتي مش موجوده اتلهف عليكي وكأن مفيش في البيت غيرك... وفين حلا وحضرو اكل ل حلا
غمزت لها وقالت.... طبعا منامش غير لما اكلك بإيده
لعبت لها حواجبها بتسلية وقالت... مش كده
ابتسمت حلا و قالت... هو حنين بيعتبرني زي بنته بس ليالي قالت لها.... بطلي هبل بقى بقول لك بيحبك
في اللحظة دي تليفونها رن وكان عاصي اللي كان بيتصل يطمن عليها كعادته لما يبعد يومين
حلا مسكت الفون وشردت بعدين سابته تاني من غير ما ترد
ليالي بصت للفون وبصتلها... هو انتي مش هتردي
حلا قالت.. لا
ليالي قالت... حلو التقل برضو.. مش بعيد تلاقيه ساب شغله وجالك علي ملا وشه
حلا ابتسمت بحزن مغلف بسخرية وليالي اتنهدت بحزن عليها
......
عند مرام كانت قاعدة في مكتبها قدامها ورق كتير ومشغولة جدا فهي كانت بتحاول طول الوقت تلهي نفسها في الشغل عشان متفكرش في زين، كمان كان عندها اصرار انها تنجح وتعرفه انها هتفضل قوية، كانت عاوزة توصله انها مش قاعدة تبكي علي اللي حصل بينهم وانه ماثرش فيها وانها كانت مجرد تجربة فاشلة اتخطتها بعد ما داست عليها بجزمتها
قاطعها صوت رنة تليفونها، رفعت عينها من علي الورق وبصت علي شاشة الفون اللي موجود قدامها علي المكتب
وبمجرد ما شافت الاسم غمضت عيونها واتنهدت بضيق
مسكت الفون وردت بضيق لتسمع صوته السمج لما قال.... وحشتيني
غمضت عيونها وبعدين قالت بحدة... طارق.اظن مينفعش خالص الكلام ده. انا لسه في عدتي يعني حتي مينفعش نبقي في مقام المخطوبين
قال علطول... بس هنتجوز ما احنا متفقين
قالت... متفقين بعد العدة ما تخلص طول ما لسه مخلصتش مش هينفع نتكلم
....
بعد يومين في منتصف السرايا
ليالي قاعده علي الكنبة مشغوله في الموبايل نزلت حلا قربت و قعدت هي كمان بصمت
بصتلها ليالي وقالت....عامله ايه دلوقتي احسن
حلا كانت عارفة هي تقصد ايه لكن عملت عبيطة و قالت.... اه الحمدلله خفيت
رفعت ليالي حاجبها وقالت.... انتي عارفة انا بسألك عن ايه
حلا قالت...امممم.لا انا اصلا مش فاكرة نسيت
ليالي قالت...ياشيخة
قالت حلا ...لااااا مش عشان قعدت معاكي وفضفضت بكلمتين هصعب عليكي والجو ده. انا عادي خالص اهو. انا زي الفل ولا فاكرة اي حاجة من امبارح اساسا
ابتسمت ليالي وهي قالت بتحاول تغير الموضوع... قولي انتي بقا مروحتيش الشركة ليه النهارده وامبارح وقاعدة زي العواطلية
ليالي قالت بضيق... اخوكي ياختي عمل فيها جوزي ومنعني انزل
رفعت حلا حاجبها وقالت... علي اساس كنتي بتنزلي بإذنه يعني
ليالي قالت... ماهو. احم
وسكت
حلا قالت بترقب... حصل حاجة ولا ايه
ليالي حكتلها اللي حصل وحلا قالت...احييه.. مش انا مش طايقاه. بس تستاهلي
ليالي بصتلها بغيظ وقالت... وهو اللي عمله فيا قليل.
حلا قالت ... يابنتي انا كده كده معاكي ف انك تربيه بس من غير ما تغلطتي ويمسك عليكي غلط. فهماني
ليالي قالت... انا مغلطتش.. هو شريكه اللي زودها انا ذنبي ايه
كملت و قالت....وبعدين قعد يشتم فيا ويقول الفاظ مش كويسة
وهي بتتوعدلو.... وحياة امي لا اندمه
حلا قالت... حقك
وليالي قالت... هو دلوقتي اشتغلي في الازرق وقعدني في البيت ...بس وربنا ما هعديها
قالت حلا بتشجيع.... جدعه يا بت.. انا عاوزكي تطلعي عينه..مش هو اخويا انا اللي بقولك ندميه وخليه يلف حوالين نفسه كده و..
اتفاجئت بمراد من وراها...و ايه كمان يا روح امك
حلا لفت لاقيته بلعت ريقها وهي بتقول بزهول... احييييه
بس علطول بصت لليالي وقالت .... انتي ايه يا شيخة مش مكفيكي كل اللي عملتيه ما الراجل اهو عمال بيعتذر وطالب الرضا وانتي ايه الجبروت ده..دلع بنات
ليالي رفعت حاجبها وهي قامت تخلع بسرعة قبل ما ياكلوها
بس مراد قالها بتوعد.... اتكي عليا بس
لفتله وقالت بردح... وانا كنت عملت ايه ياخويااا ما تتشطر عليها ولا مقدرتش عليها هتتشطر عليا انا
ومشيت ببرود وهي بتقول... دي ايه البلادي ديي
اما ليالي بصتله بضيق وراحت تمشي بس وقفت لما قال...انتي مش شايفة انك غلطانة
بصتله وقالت...لا
بس هو قال... لا انتي غلطي
كمل وقال.... بس انا هعديلك غلطك لاني واثق انك عملتي كده بدون قصد عشان بس تثيري غضبي..انا هعديه لاني لسه باقي عليكي
: طلقني
قالتها وعينها في عينه بتبصله بقوة ليقول بتعب.... ليه ياليالي. قولتلك قبل كده اني بحبك ومعنديش استعداد اخسرك ابدا.. ليه مش عاوزة تغفري
مسك ايدها وقال... تعالي نبدأ صفحة جديدة وصدقيني مش هتندمي
بس هي سحبت ايدها بجمود وقالت... وانا معنديش استعداد ل ده لان عمري ما هتقبلك في حياتي...
عارف ليه. عشان بكرهك يامراد. عارف يعني ايه بكرهك وعمري ماهحبك ابدا
وسابته وطلعت وبقي هو واقف يبص علي اثرها بحزن
واتنهد بتعب وخرج
....
مساءا
عاصي كان رجع بعد ما عرف ان حلا تعبت وافتكر انها عشان عاوزة تطلق ، كانو متجمعين كلهم وهو كان معاه مكالمة، خلصها وقرب عليهم
الحاج همام قال... في ايه ياولدي
عاصي قال بكل هدوء... المأذون علي وصول
بص ل حلا وقال... نص ساعة بالكتيىر وكل حاجه هتخلص
بس همام قال بحزم...انا قولت قبل كده مفيش طلاق هيحصل
عاصي قال... ياعمي..
بس قاطعه وقال بصرامة... قولت مفيش طلاق
هنا حلا برغم وجعها لكن قامت وقالت... يعني ايه ياخالو
وبصت ل عاصي وقالت... انا مش عايزة اكمل معاه
رجعت بصتله وقالت.... وانا قولت لحضرتك قبل كده وحضرتك وعدتني
هنا همام مكانش عارف يقولها ايه. هو استحالة يسمح ان ده يحصل، ف اتنهد وقال.... انا مش بغصب عليكي يابنتي بس بقول تدو لبعض فرصة
بس حلا قالت بجمود... انا مش عايزة
وعاصي كمان قال .... انا شايف ياعمي اننا بنضيع وقت عالفاضي. انا بعتبر حلا زي اختي ومفيش حاجة هتتغير
حلا في اللحظة دي قلبها اتكسر حرفيا من جملته اللي قالها وهو نفسه ميعرفش انها هتوجعها اوي كده، فهو مش حاسس بحبها ليه من الاساس بالعكس هو كل اللي حاسه انها بردو بتعتبرو اخوها
وهو كان كمل وقال... وهي كمان انا مش هقدر اظلهما.. هسيبها تكمل حياتها مع اللي قلبها يختاره
بس همام قال... اعملو اللي انتو عاوزينه
وقبل ما يتنفسو براحة
قال.... بس بشرط
بصولو باستفهام فقال... بعد ما تخلص جامعتها وتتخرج
بصولو ولسه هيعترضو قال.... دا اللي عندي . تتخرج وبعدين اعملو اللي انتو عاوزينه
بص ل حلا وقال... انتي مش في اخر سنة
حلا قالت.. اه
قال.... خلاص مجتش من كام شهر.. يلا كلم الماذون قولو يا يتعبش نفسه وييجي
لكن رجع قال في نفسه فرصة ييجي، وهو بيبص علي مراد... ولا خليه ييجي يطلق ليالي ومراد
مراد قام باعتراض وقال.... نعمم
همام قال....اظن انا كنت مديلك مهلة ولا نسيت
بس مراد قال ببرود ... وانا قولت مفيش طلاق
ليالي بصتله بشراسة وقالت.... يعني ايه
قال.... يعني مش هيحصل غير بمزاجي. لو انا عاوز كده. طول مانا مزاجي مش جايلي هتفضلي زي ماانتي
لسه ليالي هتتكلم ابوها بصله و قال... انا لحد دلوقتي عامل حساب انك ابن اختي ومش عاوز اتعامل معاك بطريقة تزعلك بس كده انت اللي هتضطرني امشيها عافية
بس مراد متهزش فقال.... انا اللي لحد دلوقتي مش عاوزه اخد رد فعل بس ان فضلتوا في العند ده هتلاقوني طالبها في بيت الطاعه
هنا زين فاجأهم لما قال..... ولاااااا يا تطلق بالذوق يا انت عارف انا ممكن اعمل فيك ايه
وليالي هي كمان بصتله وقالت .... وانا ممكن بكل سهوله ارفع عليك خلع
وبصت لزين وقالت.... وبمساعده اخويا طبعا
هنا عاصي قال..... اوووعى حلو اوي حب الاخوات اللي بيظهر فجأه ده حصلت معايا قبل كده سبحان الله يا جدع
حلا بصتله بضيق والحاج همام فرح اوي ان اخيرا زين اعتبر ليالي اخته
وزين قال لمراد.... انا شايف انك تطلق بهدوء احسن ليك
ليالي قالت وهي بتبص لمراد بجحود.... وحتي لو مطلقش براحته. انا شايفة ان الخلع انسب حل
هنا مراد ابتسم بقهر وقال... عاوزة تخلعيني يابنت عمي
كانت بتبصله بصة واحدة قادرة فهي دلوقتي مستقوية بأخوها وابوها
بس هو فاجأها لما قال.... وانتي متلزمنيش... عاوزة تطلقي مش كده.. انتي طالق
يتبع......
رواية جمعتهم الأقدار الفصل الثاني والأربعون 42 من هنا
اقرأ الرواية كاملة من هنا (رواية جمعتهم الأقدار)
