اسكريبت قطتى بقلم سلسبيل أحمد
- علفكره انتي حلوة وتستاهلي كل خير متعيطيش
= مين حضرتك ؟
- انا كل خير
كانت رساله اتبعتتلي وانا بعيط في الجامعه مسحت وشي وبصيت حوليا وبعدين رجعت اكتب سبقني وبعت مسدج
- متبصيش حوليكي كتير وقومي اغسلي وشك عشان بتبقي حلوة وانتي زعلانه.
اتعصبت: انت مين والا هعمل بلوك!
- هعرف اكلمك برضو
عملت بلوك خلقي ضيق ومكنتش مستحمله حاجه ودخلت الحمام اعيط براحتي بدل الفضـ ـايح دي
خرجت لقيت واحد واقف قلبي دق بسرعه وحسيت ان هو واتوترت بس طلع مستني واحده تانيه اتنهدت ومشيت شوية و لقيت فوني رن بـرقم غريب
- الو؟
= علفكره انا معجب يعني مش طريقة تعامل دي وبعدين امشي براحه عشان العربيات ؟؟
قفلت في وشه وبصيت حوليا تاني ! ملقتش حد فضلت امد لحد البيت واخيرا وصلت جاتلي رساله تاني علي
الواتس
- مش عايزك تزعلي ابدا مفيش حاجه تستاهل دموعك تنزل ها.. واه متبقيش تعيطي تاني وانتي بره ونامي كويس عشان هتروحي الجامعه بكره عندك سيكشن مهم
شوفت المسدج وعملت سين منكرش اني ارتحت حبه بس مين دا اكيد حد فالجامعه!
|| تاني يوم ||
- صباح الخير ياريت تكوني نمتي كويس
|| بعد شوية ||
- بعد كدا لما يجي مترو وتلاقيه زحمه تستني غيره!!
" ابتسمت ابتسامه هبله اوي معرفش سرها "
اخيرا وصلت الجامعه بالمناسبه انا كليه طب اسنان ودي اخر سنه ليا..
|| بعد السيكشن ||
لقيت رساله تاني
- ممكن افهم انتي ازاى تقعدي جمب ولد؟؟ وبعت ايموجي متنرفز و وشه احمر
معرفش ليه ضحكت و رديت: كان في بينا مسافه !
"ازاى بعت كدا ولا ببر ليه اصلا؟؟"
- لو قعدتي جمب ولاد تاني هتلاقيهم مدبـ . ـحين قدام عينيك يا عسل
"قعدت اضحك ومردتش بعد ثواني.. بعتلي"
- ومفيش تصبحي علي خير
قفلت الفون وانا ببتسم تخيل شخص بيغير عليك وبيخاف عليك وبيهتم بيك وانت متعرفوش اصلا
شوية ولاقيته بعت مسدج ؟
- تصبحي على خير يا سولي
كمان عارف ان اسمي سلمي لا وبيقولي الدلع؟!
>>>>>>>>>>>>>>>>>>>>>>>>>>>>>>>>>>>
|| تالت يوم ||
- ذاكري كويس الإمتحانات قربت
|| رابع يوم ||
- عارف انك زعلانه لانك مش عارفه تذاكري الماده كويس بس متقلقيش
فات دقيقه وبعت صور كتير لمذكره الماده وشرحها مرتب جدا ومكتوب بخط حلو
- ذاكري من دول على ضمنتي وان شاء الله ربنا
يوفقك يا قطتي
|| يوم الامتحان ||
- ادعلي قبل ما تبدئي وخدي بالك من نفسك
||بعد الامتحان||
- شوفتك وانتي مبسوطه اكيد عرفتي تحلي انا فخور بيكي جدا اشطر كتكوتة يسولي
رديت عليه بأمتنان: شكرا اوي
وبعت قلب بنفسجي
- انا جمبك فى اي وقت
= مش هتعرفني انت مين طيب ولا بتشوفني ازاى
- فاضل حبه وهتعرفي كل حاجه
|| خامس يوم.. ||
صحيت على مسدجات كتير !اوي
1- اتقدملك عريس
2- والله عال اوي يا هانم
3- تعرفي لو قابلتيه
4- ولا تقعدي معاه حتي ولا تشوفيه
5- ارفضي رفض قاطع
6- ومتكليش من علبه الشوكلاته الي جابها
7- رجعهالو فاهمه
8- خلي والدك يرجعها اوعي ترجعيها انتي
قريت كل دا وانا مصدومه عريس فين دا انا لسه صاحيه وهو عرف قبلي وكمان عرف انوه جايب شوكولاته ؟
شوية وماما دخلت: كل ده نوم ؟؟؟
بصتلها بتوهان وخبيت الفون
- اتقدملك عريس زي القمر مرضتش اصحيكي بس عشان رجعتي من الامتحان تعبانه
= انا رافضه
"اية ! الكلمه طلعت مني تلقائي!!! "
- رافضه اية يعبـ ـيطه انتي دا شيك جدا وقمور وشغال مهندس مفهوش غلطه
= وجايب علبة شوكلاته ؟
"يخربيت لساني! "
بصتلي بطرف عينيها: وانتي عرفتي منين
ضحكت بستهبال: ههههه توقعت مش شيك ومهندس اكيد جايب شوكولاتة بس انا مش عايزة ارفضيه وقولي لبابا يرجعله الشوكولاتة
- طيب خليه يرجعها الشوكولاتة الي بالبندق..
= بندق ؟
- اه
= ولا يهمني مش موافقه برضو
شوية ولقيت مسدج منه الي ملففني حولين نفسي دا
- رفضتي ولا لسه
ضحكت بخبث وقولت ارد ب اللف والدوران بقي انا كمان مش هيشتغلنى لوحده..
= لسه بفكر اصله عريس كويس
- لا يحبيبيتي مفيش تفكير اخرجي عرفي الاسرة
الكريمه الي بره عندك دي انك رافضه بدل ما اجي
اشر حك انتى
= دا قمر حتي؟
- انتي شوفتيه!!!
= لاء دي ماما بتقول
- ماما اه طب بصي يا يعيون ماما العريس دا لو اتقبل هيبقي ذنبه فى رقبتك عشان مش هيطلع عليه نهار امين.؟
ضحكت وبعتله الايموجي دا 🤷♀️
- واياكي ثم اياكي تقربي ناحيه علبه الشوكولاتة
= انت دافع حقها ولا اية وبعدين دي بالبندق ياخي
- هبقي اجبلك واحده بالمكسرات كلها وانا جي مش بالبندق بس
رديت بغباء: جاي فين
- جاي اشرب شاي مع عم محمد ملكيش دعوة
= كمان تعرف بابا طب قولي بس مراقبني ازاى
- اكيد اعرفه ومش هقولك
قلبي قعد يدق وانا مبسوطه!!
مسدجاته الإيجابيه فضلت تتبعت كل يوم امتحان بأستمرار ويمكن هي الى كنت بتديني طاقه اكمل..
|| يوم الاجازة ||
- انا عارف انك تعبتي اوي بس انهارده اجازة ريحي وذاكري بليل عشان اخر امتحان بكره اجمدي يا قطتي
*تاني يوم *
- اهدي خالص عشان تعرفي تجاوبي وسمي الله واقري
دي ( لا إله إلا أنت سبحانك إني كنت من الظالمين، يا حي، يا قيوم برحمتك أستغيث، ربّ إنّي مسّني الضر وأنت أرحم الراحمين.)
( صلي عالنبي )
(- ربّ اشرح لي صدري ويسّر لي أمري، واحلل عقدةً من لساني يفقه قولي.)
* بعد الامتحان *
1- مبروك اخر يوم فى الامتحانات
2- يمكن مكنش احسن حاجه بس انتي عملتي الي
عليكي وزياده اوعي تزعلي وربنا مش هيعمل حاجه وحشه ابدا
قريت كلامه وابتسمت روحت عشان ارتاح نمت كتير بس صحيت على صوت غريب كذا صوت مع بعض قومت ابص في اية لقيت عريس قاعد معاهم تاني!
ضحكت وروحت افتح الفون اشوفه عرف ولا لسه
بس استغربت لما ملقتش مسدج فضلت فى الاوضه لحد ما مشيوا مركزتش معاهم قد ما ركزت على الشات وانه مبعتش حاجه بقاله حبه وحسيت بضيق.
اخيرا مشيوا وماما دخلت
- مش موافقه
= انا لحقت اتكلم يابنت الجز.مه!!
- بقولك اية يا حجه انا قرفانه اوي ومش عارفه بيجولي من انهي داهيه دول والله ما هوافق هه
- اهه يقليلة الادب دا ابن ناس ومحترم دا انتي خسارة فيه بس هقولك اية انا مخلفتش بنات
= متشكره
بغيظ: يعني مش موافقه دا كويس بقولك
= ومهندس؟
- لا يخفيفه دكتور ماشاء الله واخلاقه زي الفل
= جايب شوكولاتة؟
وهي ماشيه: اهه بالمكسرات بس مش هتدوقيها وحيات امك
= طيب ما.!!! اية مكسراااات!! ايععععع
مسكت الفون بفزعه وكتبتله: انت؟؟؟
= مبروك يا قطتي عمي موافق وحماتي موافقه وقالو هيخدوا رأيك
- يلهوي !!! هو انت؟
= فرحانه صح انا عارف كنتي فين صح نايمه برضو؟
- فرحانه! دا انا لسه رفضاك
- اية رفضاني؟؟؟
= رفض قاطع!
- ينهارك مش فايت يا سلمي
= وانا اعرف منين انه انت هشم على ضهر ايدي؟؟
- ماهي الهانم لو صاحيه عشان تخرج تشوفني بس ازاي استاذة غيبوبه معايا
- روحي قوللهم رجعت فكلامي منك لله
= لأجل علبة الشوكلاتة الى بالمكسرات بس
- ومالو مش مهم بالهنا
" خرجت وانا وشي فى الارض ولقيت ماما بتكلم بابا "
- ورفضته الغبيه برضو
= احم انا بقول يعني اشوفه
لقتها زغرطت وبابا ابتسم
= اية جماعه بقول هشوفه بس؟؟
قامت تحضني: مبروك يحبيبه قلبي
= يماما هشوفه انتوا بتسمعوا منين
بابا كمان بصلي: محترم جدا قرار مظبوط ربنا يتمم علي خير ياحببتي
= يحج استني طب يحج حج كامل
متجيبو شربات بالمره طب ؟
>>>>>>>>>>>>>>>>>>>>>>>>>>>>>>>>>>>
و بعد ايام وليالي من الالحاح الرهيب جه تاني بس المره دي معاه اهله و للاسف وقعت في دباتيبو
قصدي احلي وقعه في الدنيا
|| يوم الفرح ||
كنت متوتره وحاسة انى وحشه كنت خايفه بس كالعاده هو بيغير اي حاجه وحشه للاحلي
- اية القمر ده بسم الله ماشاء الله
- انا حلوة؟
= انتي اجمل حد شافته عنيا ومش شايف حد جميل بعدك والله!
- وانت طلع شكلك زي ما تخيلته.. جميل
= و انتي جميلة بروحك جميلة من جوه وكمان من بره سمكتي
- اية موضوع سمكتي دا عشان اسمي سلمي وكنت بتقولي قطتي ايه بقا سمكتي دي
= بصي ياستي بقا سمكتي دي عشان انتي احلي سمكه في البحر بحاله
ابتسمت: بس انت طلعت عضلات و كده يخبيث يغامض انت!! عشان كده قولت لازم اوافق
= بجد ؟ يعني موافقتيش عشان علبه الشوكولاتة
بنفي: اكيد عشان علبة الشوكولاتة
= الاه؟ عموما طب اية رأيك في البدله
- حلوة اوي بجد .. عشان ذوقي.
= ياساتر يارب
- مش هتقولي راقبتني ازاى؟
= لا دي اسرار المهنه.. عايز اقول حاجات تانيه احلي
- طب قول
ابتسم: كنت مأجلها و حابب اقولك بعد كتب الكتاب عشان اخد راحتي بقي
- طب عايزه اقول انا الاول بصراحه انا وافقت عليك عشان انت جتلي فى وقت مكنتش عايزه اقرب من حد وانت قربت غصب عني واحده واحده لحد ما اكتشفت اني اتعودت عليك كل يوم وكل دقيقه اه مكنتش برد غير كل فين وفين بس حبيت وجودك
- بحبك! يا قطتي
= وانا كمان بحبك اوي
- متجيبي حضن.؟
= لاء لما الفرح يخلص
شدني لحضنه: تؤ ما احنا كتبنا الكتاب خلاص
>>>>>>>>>>>>>>>>>>>>>>>>>>>>>>>>>>
#قطتي تمت.🩷🐈
