اسكريبت" نيمو" بقلم شهيره عبد الحميد
"نيمو " بقلم شهيره عبد الحميد
كان عندك كام سنة لما عرفت أن دوري هي الشخصية الشريرة الوحيدة في فيلم "NEMO"؟؟!
طيب لو لسه مخدوع في دوري أو "عميلة المحيط" زي ما هتعرف دلوقتي كمل الحكاية دي وأقرأ بتركيز شديد.
دوري مش سمكة من فصيلة ال "الهيبو تانج" اللي بتعاني من فُقدان الذاكرة المؤقت زي ما ادعت وخدعتنا كلنا لأ، دوري أصلها من سمك "عملاء المحيط" أو "طُعم القروش".
ودي بيكون دورها عبارة عن عميلة بتقدر توهم الأسماك أنها بتساعدهم في حين أنها بتستدرجهم نحو الهاوية بمعنى!
بمعنى أنها سمكة مُكلفة بجلب الطعام للقروش المتوحشة في حين ضمان معيشتها في المحيط، زي ما شوفناها في بداية الفيلم وأول مشهد ليها وهي واقفة في نص المحيط بدون خوف أو مخاطر.
دوري من أذكى أنواع الأسماك في المحيط لأنها بتقدر تخدع فريستها بشكلها الجميل وحجمها ولونها اللي بيديها انطباع جيد جدًا في خداع الضحية اللي مستحيل تفكر أنها جاسوسة.
وده اللي شوفناه في رحلة نيمو كلها اللي كانت طول الوقت عبارة عن مقابلة قروش ومغامرات وكل مرة بيتصدم أنه ماشي في طريق المخاطر ومش فاهم السبب!
لو ركزنا شوية على لون عيون دوري في الطبيعي هنلاقيه بنفسج وده لما بتحب تدعي الكياتة والطيابة قدام فريستها.
لكن وقت ما القروش كانت بتلاحقها هي ونيمو عيونها كانت بتتحول للون الأسود تلقائي وده لون الشر اللي بيسيطر عليها وبتكون في قمة سعادتها بالمعركة اللي بتدور حواليها ومنتظرة أن القرش يكسب ويلتهم الضحية.
ولأنها أذكى من أي فصيلة سمك ممكن تسمع عنه بتدعي النسيان وفُقدان الذاكرة ده بحجة أن محدش هياخد على أخطائها ولا هيلومها على فعل.
وده علشان تضمن أن الضحية اللي بترافقها تفضل واثقة فيها للنهاية ومتقعدش تربط بين الأحداث اللي بتحصلهم.
يعني دوري مأمنة نفسها من كل الجهات، بحيث لو الضحية اتاكلت أهلًا وسهلًا، متاكلتش بردو متتأذيش ومحدش يشك فيها.
ولو خدنا خمس دقايق تفكير على بعض هنلاقي أن دوري كان عندها ميزات خاصة بتقدر تستخدمها في وقتها الضروري فقط.
زي أنها اتكلمت بلغة الحيتان، وفجأة عملت نفسها بدأت تتذكر الطريق في حين أنها لو بصحيح كانت مريضة بفقدان الذاكرة ده مش هيتصلح إطلاقًا لأنه وراثة في عيلتها زي ما قالت.
للأسف، دوري تشبه شخصيات كتير في حياتنا بيوهمونا أنهم عايزين مصلحتنا وهما أكتر ناس بيدبروا لينا المكايد ومنتظرين سقوطنا.
گ/شهيرة عبد الحميد.
#دوري_مش_طيبة 🙂
بقلم/شهيرة عبد الحميد.
ممنوع سرقة النص أو نسخه، مسموح فقط بمشاركة المنشور 🖤.
متنسوش متابعة لصفحتي، وقراءة بقية الأعمال 🖤.
#انسة_شين.
#شهيرة_عبدالحميد.
