رواية تنه ورنه بقلم شهيره عبد الحميد
رواية تنه ورنه بقلم شهيره عبد الحميد
طبعًا كلكوا عارفين أن "تنة ورنة" هي جنية زراعية نتجت من أول ضحكة لبيبي صغير.
وأنها قد إيه مسالمة وجميلة وقصة اكتشافها لموهبتها كانت كلها تحفة ولطيفة وبتدل على جمال شخصيتها.
بس محدش يعرف أن الطفل اللي اتولد في بداية الفيلم هو أساسًا "دراكولا" والجنية تنة ورنة اتكونت من ضحكته.
يعني تنة ورنة الجنية الجميلة اللي كلنا حبناها، في الأساس هي شريرة وهتكتشف ده لما دراكولا يكبر ويتجه لطريق الشر، فهي تلقائي هتتحول شخصيتها بغير إرادتها وهتأذي أقرب الأشخاص ليها.. "نسمة" اللي كلنا شوفنا المشاكل المستمرة اللي كانت بينهم.. لكن للأسف.
تنة ورنة في لحظة غضب وتهور هىتقتل نسمة بدون وعي ولا رحمة، وهتهرب في مكان معزول قبل ما حد يكشف جريمتها وهي كارهة كل الجنيات وحتى البشر.
في البداية هتكون مستغربة نفسها وليه فجأة بقت بتكره كل الجنيات وجواها روح انتقامية متعرفش اتكونت أمته وازاي.
لحد ما هتنام في ليلة وتحلم بدراكولا بيكلمها من تحت الأرض وبيقولها أن روحها مربوطة بيه وفي انتظارها.
مش هتقدر تقاوم احساسها وهتهرب وتروحله بإرادتها علشان تكتشف سر نفسها.
وهتتفاجئ أن دراكولا محتجز "بيتر بان" عنده في قفص وده أقرب صديق لتنة ورنة.
وعلشان تثبت ولائها وعدم خيانتها طلب منها دراكولا قتل بيتر بان بنفسها.. في البداية كانت مترددة إزاي ممكن تخلص على أقرب أصدقائها بالشكل ده ؟؟
لكن غريزة الشر اتحكمت فيها لتاني مرة على التوالي وعلشان ترضي غرورها وتحس بقوتها خلصت على أقرب شخص ليها بنفسها.
ومن وقتها تنة ورنة رمز للشر والخيانة، واتسجلت اسطورتها الخفية بإسم "متخفية البراءة".
وتم صنع أكثر من تمثال ليها في جميع أنحاء العالم بنفس الشكل الموجود بالصورة علشان الاطفال ميتخدعوش فيها من تاني ولو ظهرتلهم يهربوا منها قبل ما تنفذ انتقامها.
بقلم/شهيرة عبد الحميد.
ممنوع سرقة النص أو نسخه، مسموح فقط بمشاركة المنشور 🖤.
متنسوش متابعة لصفحتي، وقراءة بقية الأعمال 🖤.
#انسة_شين.
#شهيرة_عبدالحميد.
