رواية مصاب فى قلبى بحبها الفصل الأول 1 بقلم ندى الشريف
 |
| رواية مصاب فى قلبى بحبها |
رواية مصاب فى قلبى بحبها الفصل الأول 1
:_جهز نفسك...بليل هتمرن متدرب جديد.
"_إسمه ايه؟
:_رسيل رأفت.
" _نعم...انت عارف اني مبدربش بنات، دول مش بتوع بوكس.
:_ انت هتناقشني ولا ايه؟ الساعه ٦ تكون موجود.
قولت في سري وانا بلم حاجتي:_ انا هخليها تكره اليوم اللي شافتني فيه.
خرجت من النادي وانا بدعي علىٰ بتوع حقوق المر*أه ركبت الموتسيكل بتاعي وطلعت علىٰ الجامعه عشان عندي محاضره.
أول ما وصلت قابلت علاء صاحبي اللي قالي:_
عامل ايه يا يسطا.
قولتله وانا بنزل من فوق الموتسيكل:_ الحمدلله، مطلعتش المدرج ليه؟
"_بيني وبينك يا زميكس! انا مش عايز اطلعها، الدكتوره اللي بتدينا أبرد منها ما شوفت.
:_انا عارف يبني الستات مالهم، شايفين نفسهم علينا، تخيل النهارده همرن بنت بوكس!
قالي وهو بيخبط كف بكف:_ الحريم اتجننوا يا جدعان.
طلعت المحاضره انا وعلاء وكالعاده علاء مكانش مركز غير مع شعر الواد اللي قدامه.
خلصنا المحاضره وخدت علاء ورايا علىٰ الموتسيكل وروحت البيت، وبحكم انه جاري فطلعنا البيت سوا.
أول ما دخلت البيت سمعت أمي بتقول:_
اهو جه اهو.
قولتلها وانا بقفل الباب:_ خيير، متجمعه انتي وابويا ليه علىٰ المسا.
أبويا كح كحتين وقالي:_ تعالىٰ يا إسلام عايزك.
حطيت شنطتي علىٰ طرابيزه السفره وقعدت جنب أبويا وانا بقوله:_ نعم يا با.
" _أمك لاقيتلك عروسه.
:_يادي النيله عليا...انتو مبتزهقوش!
"_يبني دي سنه الحياه وانت كبرت وعايزين نفرح بيك.
قولتلهم وانا بقوم:_ عندكم واحد تاني أفرحوا بيه.
دخلت علىٰ أوضتي وانا بهرب منهم، عايزين يجوزوني وخلاص، مش فاهمين اني لسا ملقتش البنت المناسبه.
بصيت في الساعه لاقيتها ٢ الضهر، رميت نفسي علىٰ السرير واستسلمت للنوم.
صحيت علىٰ صوت المنبه اللي بيعلن ان الساعه جات ٥،افتكرت معادي في النادي وقومت اتغديت ولبست ونزلت..
وانا في الطريق فضلت أفكر ازاي أطفش البت دي من التمرين...وموصلتش لحل.
دخلت النادي الساعه ٦ وخمس دقايق، اتوجهت لصاله الملاكمه ودخلت علىٰ الحمام علىٰ طول، غيرت هدومي وخرجت عشان أشوف مين اللي هدربها.
أول ما دخلت صاله التمرين لاقيت كابتن وليد المدرب بتاعي واللي بيرتب للمدربين الناس اللي هيمرنوهم، كان واقف جنب بنت طويلة ولونها قمحاوي.
مشوفتش ملامحها كويس، قربت منهم وتخنت صوتي وقولت لكابتن وليد:_
فين السنيوره؟
شاورلي بصباعه عليها من غير ما يتكلم، بصيت عليها وقولتله:_
دي ضعيفه متستحملش!
البنت بصتلي في صمت وحطت ايديها في جيبها وسكتت، كابتن وليد قالي:_
الآنسه رسيل بطله تايكندو وبقالها سنين بتلعب رياضه، كانت حابه تتعلم بوكس، عايزك تأهلها إنها تخش بطوله.
خلص كلامه ومشي وسابني انا وهيا، قولتلها وانا بمشي:_
تعالي يلا..خلينا نشوف مواهبك.
قولتلها وانا ماشي:_ لعبتي بوكس قبل كدا؟
قالتلي بهدوء:_ لعبت...بس علىٰ قدي، وحبيت أحترف فيها.
صوتها كان رقيق وهادي، قولتلها بمكر:_
طب ما توريني وصلتي لحد فين.
طلعتها الكلبه ولبستها الكلفظ، قولتلها وانا بسخن:_
قدها ولا كتكوت ضعيف الجناح؟
قالتلي بثقه:_ جرب يا كوتش.
قولتلها في سري:_ انتي اللي طلبتي.
ملحقتش أضرب واتفاجئت ببوكس في وشي، خبيت وشي إيدي ولاقيتها بدأت تضرب في جنبي.
اتفديت ضرباتها وقولتلها بحماس:_
شكلك فاهم يا نصه.
هجمت عليها ببوكس ورا التاني، اتفديت كتير بس كنت بصيبها، أكيد مش هتغلبني وانا المدرب!!
كانت مركزه علىٰ جنبي لأنه أكتر مكان مؤلم، مكنتش طايل غير وشها.
حسيت إنها تعبت لما قالتلي:_
مش هنبدأ التمرين بقا.
قولتلها وانا بدرب إيدي في بعضها:_ ما هو دا التمرين.
كنت بقولها وانا بضرب:_ الستات مكانها المطبخ..مش في حلبه ملاكمه.
قالتلي وهيا بتتفادىٰ الضربات:_ رأيك دا تخليه لنفسك.
إتفاجئت بيها إدتني بوكس جامد في وشي خلاني أرجع لورا، أتخضيت من قوتها...
قولتلها وانا بتأكد ان فكي سليم:_ بتعرفي تلعبي، بس ناقصك حاجات.
قالتلي وهيا بتطق رقبتها:_ والمفروض انك تعلمهاني.
نزلنا من الحلبه وبدأنا نتمرن علىٰ الجزء العلوي، كل مره حاولت أثبتلها إن مكانها المطبخ كانت بتبهرني.
خلصنا تمرين الساعه ٩،قولتلها وانا بقعد علىٰ التخت:_
معادنا سبت وتلات، لو اتأخرتي هتتعاقبي.
قالتلي وهيا بتعمل إسترتش لإيديها:_ انت داخل عليا حامي بس ماشي.
قولتلها وانا بحذرها بصباعي:_ إحترمي نفسك وانتي بتكلمي المدرب بتاعك.
قومت من مكاني ودخلت الحمام عشان أغير وامشي..
خرجت من النادي وأتصلت بأمي عشان لو عايزه حاجه أجبهلها.
قعدت علىٰ كافيه جنب النادي ساعه تقريبًا كعادتي عشان أفصل من التمرين، وخرجت منه لما حسيت ان جسمي إرتاح.
ركبت الموتسيكل وقولت أخش مطعم أكل فيه...وانا ماشي علىٰ الطريق لمحت مطعم علىٰ الطريق.
كان مطعم "....."، مفيش حد دخله ومشكرش فيه، ركنت الموتسيكل قدام المطعم ودخلت، كان باين عليه الفخامه مفيش كلام!!
قعدت علىٰ طرابيزه كانت في نهاية المطعم، قلعت الچاكت بتاعي وحطيته علىٰ الكرسي اللي قدامي، فتحت المنيو وبدأت أقرأ فيه..
لمحت جرسون بيقرب عليا، وقف جنبي وقالي:_
تطلب ايه يا فندم؟!
كان صوت بنت، قولتلها وانا باصص في المنيو:_
عايز نص فرخه مشوية.
" _تحب تاخد معاها بوكس ولا في الحلبه بس.
رفعت عيني بسرعه لاقيتها واقفه مبتسمه وماسكه ورقه وقلم بتسجل طلباتي..قولتلها بصدمه:_
هو انتي؟!
#مصاب_في_قلبي_بحبها.
#ندىٰ_الشريف.
#الفصل_الأول.
رواية مصاب فى قلبى بحبها الفصل الثانى 2 من هنا
لقراءة الرواية كاملة اضغط هنا (رواية مصاب فى قلبى بحبها)
تابعونا على التليجرام من هنا (روايات شيقة ❤️)
تابعونا عبر أخبار جوجل من هنا (روايات شيقة ❤️)
